By Zahuktalo se opako, kak ti ga na Solunskome frontu ili na Galiciji, a mortik ka v Medaku. Bageri, kiperi, kombinirke ruju po vulicaj, ravnaju smolnatoga betona ili ti ga asfalta valjaju. Drač se kosi, ružice sadiju, a i Jezuševa koruna se kleštri. Žuriju se težaki sih feli, od jutra do zuta, jer zutra je zadnji cajt za šminku narediti, jer v subotu mora sve, na jen pot – ftihnuti.
Mesec dni fina gospoda v lepemi ancugaj i fajne frajlice v protuletnaj opravicaj od vulice do vulice, od trga do traga, od placa do placa, kak copernice lečeju i kaj sega dobra zbunjenomu puku obečavaju.
Jeni buju zaobilaznice delali, drugi vulice i kanalizacije, a tretji vrtiće, škole, igrališta i dvorane, al nišći nije rekel; gdo pak bu decu delal s kojom bi se to sve trebalo napuniti.
Drugi pak od hiže do hiže hodiju, babicaj i dedekaj v ruke kipece z svojim slikama rivleju i lepo pozdravljaju u nadi da budu baš njih v nedelju skriti za paravanom na listeku zaokružili.
Se to skupa nije nikaj na spram onoga kaj naš preštimani predsjednik dela, on pak se z kantom napunjenom čerlene farbe po Hrvatski razletel i se kaj je plavo v čerleno na silu pofarbati hoće,- ali kak se kaže, nekak mu baš i ta malarija nejde – jer predsjednik vlade z kompresorom dela.-
I tak vam je to tu pri nami v Horvatskoj majuša 2021. leta veselo i još bi nam veseleše moglo biti da sega tolvaja od corone; Capak i Beroš zašpricati bi mogli.
Tjeden bu minul, nešći bu, na izbore ziše, a nešći pak nebu. Kak zišlo da zišlo nešći bu zebran i već od pondelka za nikaj i nikoga već ne pital, no jedino bu moj pajdaš Pišta z pivom pred štecunom v roki zakričal ; DEČKI SE JE TO BILO LEPO I DOBRO I VERJEM DA BU TAK KAK STE REKLI, ALI NIŠĆE OD VAS NE REKEL- „GDO BU TO KURBARIJU IPAK NA KRAJU PLATIL“????
Antun Berljak
