Ča je to rep?

Eto, pitan ja vas ča je to rep? Znan,,, smijete se vi jerbon svi mislite „jel ovi inšempja pa nas pita pizdarije?“,,, e al sta san i ja danas kad me prika pita „čuj vamo, to si Poščer iz Malog i Velog mista, znaš sve libre pa mi reci ča je to rep?“ Ma je, zablenija ja i i deboto san afana i mislija da me ovi zajebaje, ali onda san sta, i ka u nikon filmu, koji gledan kroza škure, došle su mi slike iz ditinjstva pa san se vas skonšuma jerbon san svati da je cili moj život jedan veliki rep.

Evo da van spjegan kako je to repato bilo, jerbon je to virovatno i vamin.

Bija san mulac na Matejuški, i igrali se mi na kukalo i neke druge berekinade, a viče meni mala Kate, od onega poteštata sa Matejučke, a bila mi je draga,,, ča je je,,, i viče ona meni „biž mali tamo, skri se jerbon „čuva mijo rep da ne bude slip“,,, i sta ja iza nikega velikega barila, a ona jopet viče „vidi ti se rep“,,, ma koji rep beno jedna mala, pitam se ja…di je meni rep…  I eto, tu van je sve počelo. Od tada san cili cilcati vik mislija i bacila obo repu, kako bi apropo repa razumi jude, ali i sebe.

I duman ti ja duman obo repu, pa se pitan, ko to jema rep. Znan da maška jema rep, jema rep i čuko, jema ga i miš, a vidija san na Rivi i konja, pa i konj jema rep, ali ki gradsko dite, nisan vidija nikad ovcu, a na onizin slikamin ovca nima repa jerbon je ki balun. E mislin ja tako, ali je, vraga, nije ovca nika bila balota, jerbon gledan ja iz rere prema Sinju i vidin ostrigli oni ovce i eto, jema ovca repinu,,, ne repicu, nego komad repine. Eto, jopet san falija obo repu, pa sam cili cilcati život usmirija pitanju ČA JE TO REP ?

I krenija van ja u skulu, onu malu, pučku skulu, i apropo san krenija, pitan ja drugaricu učiteljicu „drugarce učiteljice mogu li na kondut jerbon triban pišat?“,,, i zblaznila se ona ume, i kaže „ne kaže se pišat nego iden činit malu nuždu,,, moraš biti pristojan“ ,,, i eto, mislin ja, skula je misto di se lipo govori pa i ja lipo njoj lipo spjega „drugarce učiteljice, moren li ja na malu nuždu, a možda ću se i posrat“,,, pa kad mi je petala trisku, vavik mi ta triska zvoni u ludari ki zvono svetega Duje. Bilo van je to vrime tako, nije me ona malo bugnula ka ća danas dite moreš malo bugnuti kad nešto grišno spariča, nego mi je petala trisku, pa aj jopet ti pogriši…. Aj nekako ja otra u kondut, al ono od triske vas san se skonšuma, kad viče ona zamenom jopet „nimaš rep, zatvori vrata“,,, i eto ti ga na, jopet rep. I dumam ja dumam na kondutu,,, aj hvala ti Bože ča niman rep, spjegan ja sebi tako, al ako ne zatvorin vrata jemat ću rep, mislin ti ja jopet. I jopet ja dumam, kako to ja mogu jemat rep ako ne zatvorin vrata,,, pa eto, možda ipak jeman rep, ali se ne vidi kroz vrata, dumam ja jopet… e pa tu na kondutu zakleja se ja, moran otkrit jema li čovik rep i zakračuna ja to pitanje za vike vikova. Pa kako nisan bija batifjaka, a volija san dotura Luiđija, otra ja na medičinu u Zabreg zbog repa. Ma ni ni počelo, kad ono judska anatomija, i gle, profešur kaže da čovik jema rep, ali se ne vidi, jerbon je nekad bija rep, a sad je niki mali repić osta, nako, ka refužo,,, u žuntu. Aha, eto ga, dunkve, skule su mi pomogle da peškam da i čovik jema rep, ma ni mu rep ki u ovce repina, ali jema rep.

Ali nije van tu štoriji obo mom repu bija kraj,,, bile to one godine 71., one godine od Prolića, kako je naša draga profešurica Savka rekla,,, ono proliće usrid zime,,, ‘nti svega, aj ti sad svati proliće usrid zime,,, Aj dobro, dakle proliće uzimi 71., kad smo se mi študenti, kano malo uspandrcali i hoćemo našu ‘rvatsku pa bati u tizi žejan,,,, ali eto belaja i barufe. Naša Savka otra u pržun, jerbon nedaju oni drugi, niki crljeni, komu-ništi. I eto, ka ono, crljeni oslobodili Zabreg, pa ulizli u nike bogatunske kuće,,,, ma vidi ti njizi bogatuna, oni bi u kućama, a mi pošumama i gorama,,,, e pa neš, kažedu ovi ča oslobađadu sve i svakoga,,, a sve kano, tu su i niki koji ustaše pa obrali bostan ,,, daklen, mislin ti ja,,,, sidili ti judi su pa ustaše i ovi se najutili što ovi ustaše,,, i duman ja onako,,, pa boje bi in bilo da su sidili,,, mislin van ja,,, e al, ovi ustaše, pa ih ovi crljeni lipo i šesno oslobodili životičai svega, i slobodno ulizli tu, i nemreš ti tu pajdo moj,,, nego čini kuco i pokri se ušiman. I eto, mi študenti, ki mladi junci, na Trgu, mašemo nikim kockastim šudariman i pivamo o onomen staron Banu i ‘rvatskoj, al moj pajdo,,, kad je pandurija sa maricama krenula, razbucali nas,,, razbižali se mi po Ilici,,, e da,,, ma po ulici Ilici, a ne po Ivici i Marici,,, jerbon su i Ivica i Marica bižali ki ludi. Pa kad te ovi uite onda si zna „e sad češ dobiti po repu“. Pobiga ja i moj rep, i sakrili se u nikon portunu, jerbon san bija športaš pa san briva ki brza brzina, ali niki sporaći su dobili po repu, a niki i ispon repa. Ti niki, ki nisu brivali ki ja, pa su dobili po repu, uitilo ih i otralo u bužu, oliti pržun. Vidin ja poslin te nike, kad su izlizli iz buže, i pitan ih za rep u pržunu? Spjegaju oni da u pržinu nima repa, jerbon su vsa vrata zakračunata tako da ona moja drugarica učiteljica nemere vikati „zatvori vrata, pa nemaš rep“. Dunkve, u buži nima repa, vengo tu moreš samo ogristi po repu. Al, reko bi moj dragi brico Roko Prč „nema politike u moju butigu“,,, neću obo tizijem političken repu, ali eto i tu je rep lipi moji čitateji.

Dunkve, nemereš brale brez repa, kakon god okreneš.

Eto ga na,,, i eto me tute, u rekli bi, ovoj našoj ‘rvatskoj, lipoj i šesnoj za koju oćemo da nima repa jerbon je svita ugledala ki beba 1991, ali je, moš se samo nadat,,, Za afanat se od muke,,, gurnuli njojzi i namin nike stare repove pa sad svi ti repovi ovu nan lipu ‘rvatsku činidu ki coto gobo. Pa van tako, dešpeto, i ova naša ‘rvatska ki da jema repove, a nima ni repa ni podrepa, kakon bi spejgali naši stari…

Eto ti ga na tute,,, kakvijeh repova jemamo ovod u ‘rvatskoj, za nevirovat, a ni krivi ni dužni…

A da štorija o repovin u ovoj našoj ‘rvatskoj ide u nastavcima, pobrinula se naša tvizija pa gledan ja nikidan nikega lipega momčinu,,, ma je je,,, lip je ki rusulica i jema cuf, jerbon nije zaresta u niku modernu kosurinu, a sve ga niki tamo pripituju,,, daj ovo, daj ono i ovo i ono… I vrti se bidan ki trotul, a ovi zajunili ki da su maniti i bisni. Napali čovika pa badnu ga tamo, pa badnu ga vamo, ki niki funcuti. Vako bisni oven bidnemu petali ovemu da jema rep, a on ni kriv ni dužan, vrti se na katrigi u čudu, jerbon nima repa,,, „neiman repa vire mi judi…“, ali je, moš ti pivat borbene, jerbon kad picaškandali kažu da si repat moreš samo podvit rep…

Takon van je to sa repinama u lipin i šesnim našin ‘rvatskin pulitikan, jerbon kad ti ga meknu, mislin repinu, ondar si u gabuli.

Eto lipi moji i šesni ‘rvati i ‘rvatice,,, skužajte, ali jeste li sad peškali ča je to rep? Ako jeste, evala van bilo, jerbon se ja i daje mućin i duman sa tizin repon, ali virujen van, jerbon nisan ja nevirni Toma…

Dunkve, cili život van je niki veliki rep. Dobro je dok san vučeš svoj rep a ne dobiješ po repu, a u podrepku ča jemaš jemaš zase i ženu, i čini kuco.

Vaš Poščer i nikega velega mista